Buri munsi, miliyoni z’abakoresha YouTube bareba amavideo, bakumva indirimbo, cyangwa bareba ibiganiro by’abahanzi n’abavuga ibitekerezo bitandukanye. Ariko se, amafaranga YouTube yinjiza ava he? Kandi ni gute abayikoresha bashobora kugabana ayo mafaranga?
Iyo tubonye umuntu wamenyekanye ku rubuga rwa YouTube, turamwishimira cyangwa tukibaza tuti: “Ese aba yinjiza amafaranga angana iki?” Ariko inyuma y’ayo makuru yose hari uburyo bunoze, bwubatswe mu miterere ya YouTube nka kompanyi y’ubucuruzi ikomeye, kandi ifitanye imikoranire ikomeye n’abamamaza ku isi yose.
YouTube ni urubuga rwa Google, kompanyi nini mu ikoranabuhanga. Ibyo bivuze ko amafaranga menshi yinjira kuri YouTube aturuka ku bamamaza (advertising). Igihe umuntu ashyize video kuri YouTube, hari amahirwe ko izagaragaramo amatangazo (ads) mbere cyangwa hagati y’iyo video.
Ayo matangazo akorwa n’amakompanyi yishyura YouTube kugira ngo ibikorwa byayo bigaragare imbere y’abareba amavideo. Iyo rero umuntu arebye iryo tangazo, cyangwa akarikandaho (click), YouTube iba yinjije amafaranga runaka.
Icyo gihe, YouTube ibika igice cyayo, hanyuma igice gisigaye igiha uwashyizeho video — ni byo bituma bavuga ko “YouTube igabana amafaranga n’abacuruzi bayo.”
YouTube ifite gahunda yitwa YouTube Partner Program (YPP). Iyi gahunda ni yo ituma umuntu ufunguye channel ye ashobora kubona amafaranga kuri video ze.
Iyo winjiye muri iyi gahunda, YouTube iguha amafaranga bitewe n’uko video zawe zirebwa n’abantu, ndetse n’uburyo bagendana n’abamamaza arimo.
Muri rusange, YouTube ifata 45% by’amafaranga yose yinjira, naho uwakoze video agafata 55%.
Urugero, niba video yawe yinjije $100 mu kwamamaza, YouTube izagumana $45, naho wowe ukabona $55.
Kugira ngo ube mu mushinga wa YPP, hari ibyo usabwa
YouTube ntabwo iha umuntu wese amafaranga. Kugira ngo ubone ayo mahirwe, usabwa:
-
Kuba ufite abafana 1,000 (subscribers) nibura;
-
Kuba video zawe zararebwe nibura amasaha 4,000 mu mwaka umwe;
-
Kuba ukurikiza amategeko ya YouTube, cyane cyane ajyanye n’uburenganzira bwo gukoresha indirimbo, amafoto n’amashusho;
-
Kuba uri mu gihugu cyemerewe n’iyo gahunda (u Rwanda ruri mu bihugu byemewe).
Ibi byose iyo ubisohoje, wuzuza dosiye yawe ukajya ubona amafaranga anyura kuri AdSense, uburyo Google ikoresha mu kwishyura abakorana na yo.
Amafaranga avuye mu zindi nzira kuri YouTube
Si kwamamaza gusa bitanga amafaranga kuri YouTube. Abanditsi n’abahanzi benshi batangiye gukoresha n’andi mahirwe arimo:
-
Memberships (Abanyamuryango): Abafana bishyura buri kwezi kugira ngo babone amahugurwa cyangwa video z’ibanga.
-
Super Chat & Super Thanks: Abafana batanga inkunga mu buryo bwo gushimira uwo bareba mu gihe cya Live.
-
Affiliate marketing: Uwo ufite channel ashobora kwamamaza ibicuruzwa by’abandi akabona amafaranga kuri buri gicuruzwa kigurishijwe biciye kuri we.
-
Sponsorships: Amakompanyi agasaba nyir’amavideo kubavugira cyangwa kugaragaza ibicuruzwa byabo muri video.
Ibi byose bituma YouTube itaba gusa urubuga rwo gusangiraho ibintu, ahubwo ikaba uruganda rw’amafaranga rutanga amahirwe ku bantu bose bafite ijwi n’ibitekerezo bifatika.
Ese amafaranga YouTube yinjiza ni angahe?
Nk’uko raporo za Google zibyerekana, YouTube yinjije miliyari zirenga 30 z’amadolari mu mwaka wa 2024 avuye ku kwamamaza gusa. Urebye neza, ayo mafaranga aturuka mu matangazo yishyurwa n’amakompanyi yo ku isi yose, ndetse no mu bikorwa by’abafana bishyura serivisi za YouTube Premium.
Ni ukuvuga ko buri gihe urebye video, haba hari amafaranga agenda hagati ya YouTube, umwamamaji, n’uwayishyizeho. Iyo video ifite abantu benshi bayireba, ni nk’ubucuruzi butaziguye — aho buri “view” ifite agaciro gato ariko gakora amafaranga menshi iyo zikusanyijwe.
Inyigisho y’ingenzi: YouTube si urubuga, ni isoko ry’ubumenyi n’ubucuruzi
Iyo utekereje neza, YouTube ni nka televiziyo y’isi yose, ariko itandukanye n’izindi kuko umuntu wese ashobora kuyijyamo.
Kugira ngo umuntu ayibyazemo amafaranga bisaba ibirenze gushyiraho video gusa — bisaba guhanga, gukomeza consistency, no kumenya ibyo abantu bashaka kureba.
Kandi nanone, abantu benshi batangira batagamije amafaranga, ahubwo bagamije gusangiza abandi ibyo bazi. Amafaranga aza nyuma, ari nk’igisubizo cy’imbaraga n’umuhate washyizemo.
YouTube ni urugero rwiza rw’ukuntu ikoranabuhanga ryahinduye isi — ryafashe amajwi n’amashusho y’abantu basanzwe rikayavamo ubucuruzi bw’isi yose.
Icyo isaba gusa, ni ugukunda ibyo ukora, gukora kenshi, no kumenya ko buri video ushizeho ishobora kuba intangiriro y’urugendo rw’ubukungu rwawe.
